جمعية قلب كبير – qalb kabeer NGO جمعية قلب كبير – Qalb kabeer NGO
كل حاجة حلوة بتبدأ بعادة صغيرة.. ومن هنا بدأت حكاية “هويتي”
في جمعية قلب كبير، بنؤمن إن الوعي الحقيقي بيتبني من الطفولة، علشان كده بننفذ مبادرة “هويتي” للأطفال واللي اطلقتها مؤسسة مصر الخير، واللي هدفها نزرع جواهم الاحساس بالهوية و القيم المرتبطة بيها زي حبنا للمكان اللي بننتمي له وحرصنا على نظافته وكمان نظافتنا الشخصية والحفاظ على البيئة
بنعمل دة بطريقة قريبة ليهم، فيها لعب وتفاعل وفرحة.
خلال اليوم، الأطفال شاركوا في ورشة بسيطة وممتعة اتكلمنا فيها عن أهمية النظافة، سواء لنفسنا أو للمكان اللي حوالينا، وبعدها كان في فطار جماعي من مؤسسة مصر الخير جمعهم في جو من الألفة والمشاركة.
ومكملناش بس بالكلام، نزلنا نطبق سوا، وننضف الساحة الخارجية بإيدينا، ونضيف لمستنا الخاصة من خلال تلوين الرصيف والحوائط بالرسم والألوان، علشان يحسوا إن المكان ده بتاعهم ومسؤوليتهم كمان.
اللي حصل النهارده مش مجرد نشاط، ده خطوة صغيرة بتبني جيل واعي، فاهم إن الجمال بيبدأ من النظافة وإن كل واحد فينا ليه دور يحافظ على المكان اللي عايش فيه.
